سنتناول في موضوع اليوم اكثر الطرق المستخدمة في سرقة الرصيد من ليبيانا و المدار وطرق معالجتها .
انتشرت في الفترة الاخيرة طرق مبتكرة لسرقة الرصيد منها برمجيات خبيثة و تطبيقات تتخصص في سرقة الرصيد بعلمك او بدون علمك او بعض الطرق الخبيثة اللي يستخدموا فيها بعض الاشخاص لسرقة رصيدك
اليك بعض الطرق المستخدمة في سرقة الرصيد
1- برمجيات خبيثة :
عند التنزيل من مواقع غير موثوقة قد ينزل تطبيق بدون علمك ويتخزن في الجهاز وغير ظاهر مع التطبيقاتوفجأة تلقي تلفونك يبعث في رسائل و اتصالات لأرقام غريبة , ارقام دولية طبعا بدون ما اتحس بيه تلقاه يتصل لين يكمل الرصيد , مش حينفع معاه انك اتفك البطارية او اتغير الشفرة لأنه المشكلة في جهازك .
طبعا هذا عبارة عن تطبيق خبيث مثبت علي جهازك مخصص في سرقة الرصيد وكل مرة اتعبي فيها رصيد تلقاه يتصل بروحة بأرقام دولية وفي اوقات مختلفة .
في الحالة هذي لازم اول شي تقفل الماي فاي او تقطع الاتصال بالأنترنت من جهازك وادير سوفت وير لتلفونك
و السوفت وير ح يمسح كل شي موجود علي تلفونك لذالك لو عندك شي تبيه انقله علي جهاز تاني قبل ما ادير سوفت وير
طبعا فيه برمجيات خبيثة مرات تقعد حتى بعد السوفت وير , لأنه السوفت وير ما يمسح في الذاكرة الداخلية
لو درت سوفت وير و قاعد نفس البرنامج ديرله سوفت وير كمبيوتر حيتم التخلص منه .
2- كود خاص لسرقة الرصيد
فيه كود ينشروا فيه بعض الاشخاص في مواقع التواصل الاجتماعي علي انه رصيد مجاني من الشركة وعند الاتصال بالكود يتم تحويل رصيدك او جزء منه الي الشخص اللي رقمه مسجل في الكود .طبعا الكود عبارة عن ارقام وضعتها شركة المدار و ليبيانا لتسهيل عملية تحويل الرصيد ويكون علي الطريقة
المدار # 091000000*3*1*4*140*
طبعا هي عبارة عن 140 رقم الخدمة اول ما تضغط *140# حيطلعلك خيارات الخدمة للمدار و الاوامر هي رقم 4 تختار الرصيد ورقم 1 ابعث الرصيد و رقم 3 قيمة الرصيد 3 دينار و تختار (من 1-5) و في الاخير تلقي رقم المستلم
ليبيانا # 3000*0920000000*122*
ليبيانا # المبلغ بالدراهم * رقم الهاتف 092*122*.
3- رسالة تحويل الرصيد
مرات اتجيك رسالة تم تحويل 2 دينار الي رصيدك من الرقم 0910000000 وبعد 5 دقائق يتصل بيك شخص ويقولك معليش حولتلك رصيد بالغلط ابعثه ليا , وانت علي غفلة تبعث من رصيدك للشخص هذا و في الحقيقة هوا مابعثلك رصيد هوا بعثلك رسالة بس .بعثلك رسالة و كتبلك فيها تم تحويل 2 دينار الي رصيدك .
باش تتأكد شوف الرقم في اعلي الرسالة هل الرقم مرسل من الشركة طبعا ايكون واضح 120 او 12020 تقريبا
و لو القيته رقم يبدا ب 091 او 092 ما تبعثله رصيد لأنه بينصب عليك و بيسرقك .
4- القنوات التلفزيونية الاعلامية
تقدم بعض القنوات مسابقات تلفزيونية الهدف منها سرقة رصيدك , فعند الاتصال اتجيك منظومة الاستقبال حتي يتم تحويلك , طبعا لا يتم تحويلك بل تستمر في المماطلة لأطول وقت حتي ينفد رصيد .5- رسالة ربحت معنا جائزة اتصل بالرقم XXXXXXX لأستلامها
تتم هذه الخدعة من خلال طريقة تبدو لطيفة وطريفة في نفس الوقت ويقوم المخترق بإرسال رسالة نصيه إلي هاتفك ويخبرك فيها انك صاحب الرقم المحظوظ و انك قد ربحت سيارة أو شقه أو هاتف جديد وكل ما عليك فعله هو الاتصال على رقم معين حتى تعلم كيف ستستلم جائزتك من الشركة وبمجرد اتصالك بهذا الرقم يتم سحب اكثر من 30 دولار في الدقيقة الواحدة في بعض الأحيان ومبالغ اقل في أحيان أخري وبهذه الطريقة يستنفذ كل ما لديك من رصيد في خلال دقائق معدودة .وفي العادة اكثر التطبيقات الملغومة (تحتوي علي برامج سرقة ) هي التطبيقات المدفوعة علي قوقل بلاي .... كيف ؟؟؟
تجد بعض المواقع تعرض التطبيقات المدفوعة (تحتاج اموال لشراء التطبيق ) الموجودة علي قوقل بلاي بشكل مجاني للتحميل وعند تحميلها يتم تنزيل بعض البرمجيات الخبيثة معها او يطلب صلاحيات اكثر في جهازك .
ف باش تتجنب سرقة رصيدك حاول تبتعد عن أي تطبيقات تطلب صلاحيات اكثر من صلاحياتها او مواقع فيها برامج فيروسات و اختراق .
و خليك عارف انه الشركات الليبية للأتصالات مش حيعطو رصيد بدون ما يبعثولك الف رسالة
وخليك متابع ليبيا المعلوماتية او صفحتنا علي الفيس بوك و لو فيه أي طريقة زيادة رصيد او رصيد مجاني او أي شيء ينزل اول بأول في قسم اخر الاخبار